चरिकोट, २६ पुष
यस बर्षको पशुपति स्मृति सहकारिता पुरस्कारबाट ई दैनिक खबर अनलाईनका प्रकाशक तथा चरिकोट मिडिया फाउण्डेसनका अध्यक्ष जीवन लामा सम्मानित हुनु भएको छ ।
स्वर्गीय नेता पुशपती चौलागाईको स्मृतिमा दोलखा जिल्ला बचत तथा ऋण सहकारी संस्था दोलखाले स्थापना गरेको सो पुरस्कार पहिलो पटक पत्रकार लामालाई प्रदान गरिएको हो । दोलखा जिल्ला बचत तथा ऋण सहकारी संस्था लिमिटेको २४ औं बार्षिक साधारण सभाको अवसरमा पुरस्कार प्रदान गरिएको हो ।
कार्यक्रममा प्रमुख अतिथि बागमति प्रदेश बचत तथा ऋण सहकारी संस्थाका अध्यक्ष उद्धबप्रसाद सापकोटा, बागमति प्रदेश बचत तथा ऋण सहकारी संस्थाका महासचिव जिवसराज खड्का, दोलखा जिल्ला बचत तथा ऋण सहकारी संस्थाका अध्यक्ष भुमिराज खड्का लगायतले लामालाई नगद पाँच हजार पाँच सय ५५ सहित दोसल्ला, सम्मान पत्र प्रदान गरिएको थियो ।
यसै गरी दोलखा जिल्ला बचत तथा ऋण सहकारी संस्था दोलखाको २४ औ बार्षिक साधारण सभा तथा स्थापना दिवस मंगलबार दोलखा सदरमुकाम चरिकोटमा सम्पन्न भएको छ । साधारण सभाले सञ्चालक समितिको प्रतिवेदनलाई सर्वसम्मत रुपमा पारित गरेको छ ।
दोलखा जिल्ला बचत तथा ऋण सहकारी संस्थाका अध्यक्ष भुमिराज खड्काको अध्यक्षतामा सम्पन्न साधारण सभामा बागमति प्रदेश बचत तथा ऋण सहकारी संस्थाका अध्यक्ष उद्धबप्रसाद सापकोटा, बागमति प्रदेश बचत तथा ऋण सहकारी संस्थाका महासचिव जिवसराज खड्का, सहकारी अभियान्ता यज्ञराज ढुंगेल, नेपाल पत्रकार महासंघ दोलखाका अध्यक्ष दिपशंकर चौलागाई, दोलखा जिल्ला बचत तथा ऋण सहकारी संस्थाका पुर्व अध्यक्ष रामदास श्रेष्ठ, संस्थाका उपाध्यक्ष जगतप्रसाद सुवेदी लगायतले मन्तव्य व्यक्त गर्नु भएको थियो ।
