दोलखा दुग्ध उद्योग लि.ले उत्पादन गरेका छुर्पी इलाम र काठमाडौमा निर्यात गर्दै आएको छ । हिमाली जिल्लाको उत्पादन र गुणस्तरीय भएकाले काठमाडौ लगायतका ठाउँबाट छुर्पी उपभोक्ताले बढी खोज्ने गरेका छन् । बालाजु, ललितपुर, भक्तपुर, वानेश्वर, सातदोबाटो, ठमेल लगायतका ५ वटा भन्दा बढी पसलहरुमा छुर्पी लगायत पनिर, घ्यू बढी मात्रामा माग आउने गरेको छ । काठमाडौमा ३ वर्षको अवधिमा छुर्पी, पनिर घ्यू बढी मात्रमा माग आएको छ ।
आर्थिक वर्ष ०७९÷८० मा १२ हजार ३३४ केजी छुर्पी दोलखाबाट इलाम र काठमाडौ निर्यात भएको हो । यस वर्ष ९ महिनाको अवधिमा मात्र ४० हजार केजीभन्दा बढी निर्यात गरिएको दोलखा दुग्ध उद्योग लि. का लेखा प्रमुख प्रदिप शिवाकोटीले जानकारी दिनुभयो । आर्थिक वर्ष सकिन अझैं ३ महिना बाँकी रहेकाले थप छुर्पी निर्यात हुने शिवाकोटीले जानकारी दिनुभयो । गत वर्ष काठमाडौमा मात्र ६ हजार ८ सय केजी छुर्पी निर्यात गरिएको थियो ।
अहिले दोलखा दुग्ध उद्योग लि. ले दूधको परिकार उत्पादनमा बढी जोड दिएको छ । केही वर्षअघि दूध मात्र उपभोक्तालाई दिदैं आएकोमा अहिले दही, मोही, पनिर, पेंडा, छुर्पी, घ्यू र मखन उत्पादन गर्दै आएको छ । जिल्लालाई दूधमा आत्मनिर्भर बनाउने उद्देश्यले किसानलाई गाई र भैंसी पालनमा जोड दिन आग्रह गर्दै आएको छ । दैनिक रुपमा डेरीमा दूध संकलन गर्न सकेमा आर्थिक रुपमा सक्षम र आयआर्जनमा टेवा पुग्न सक्ने भएकाले किसानलाई यसतर्फ लाग्न बेला बेलामा अभिमुखी कार्यक्रमहरु सञ्चालन गर्दै आएको छ । दोलखा दुग्ध उद्योगमा हाल दैनिक रुपमा ४ हजार एक सय लिटर दूध संकलन हुँदै आएको छ । दोलखाको ८ वटा पालिका र रामेछापको खिम्तीबाट दूध संकलन गरिरहेको लेखा प्रमुख शिवाकोटीले जानकारी दिनुभयो । खिम्तीबाट दैनिक ६ सय लिटर दूध संकलन हुँदै आएको छ । गत वर्ष जिल्लामा दूधको माग धान्न नसकेपछि सिन्धुपाल्चोकबाट आयात गरिएको थियो ।
किसानलाई समेत दूधको मूल्य उचित ढंगले दिन सकेकाले एउटै किसानले वर्षमा लाखौ रुपैयाँ कमाउने गर्छन । भीमेश्वर नगरपालिका ८ निवासी हरि फुयालले मासिक एक लाख ७९ हजार दुई सय दूधबाट भुक्तानी लिदैं आएका छन् । उनले मासिक २ हजार ५ सय ६० लिटर दोलखा दुग्ध उद्योगलाई दूध दिदैं आएका छन् । उद्योगले गाईको दूध ६० देखि ७५ रुपैयाँ प्रतिलिटर र भैसीको ७५ देखि एक सय रुपैयाँ प्रतिलिटर दिने गरेका छन् । ९ महिनाको अवधिमा ७ लाख २० हजार लिटर दूध संकलन तथा बिक्री भएको छ । अहिले दोलखाबाट काठमाडौमा बसोबास गर्दै आएका दोलखालीहरुलाई दोलखा डेरीको स्वाद चखाउन काठमाडौको मीनभवन नजिक दोलखा डेरी एण्ड एग्रो मार्ट सञ्चालनमा आएको छ । त्यही मार्टमा दोलखा डेरीले उत्पादन गरेका दूधका परिकारहरु राखिएको दोलखा दुग्ध उद्योग लि.सञ्चालक समितिका अध्यक्ष लाल कुमार केसीले बताउनु भयो ।
-1743416799.jpeg)
