संरक्षणको पर्खाइमा थोबोडाँडा

बिगु गाउँपालिका

गृहपृष्ठ
बिगु गाउँपालिका

संरक्षणको पर्खाइमा थोबोडाँडा

जीवन लामा बुधबार, मंसिर १२, २०८१

संरक्षण नहुँदा ऐतिहासिक थलो थोबोडाँडा (बाह्र सय पल्टन) भग्नावशेष अवस्थामा पुगेको छ । समयमै सरोकार निकायको ध्यान नजाँदा दोलखाको विगु गाउँपालिका–१ लामाबगरस्थित महत्वपूर्ण स्थल थोबोडाँडा (बाह्र सय पल्टन) को अवस्था दयनीय बन्न पुगेको छ ।

तिब्बती सेनामाथि नेपाली सेनाले विजय प्राप्त गरेको ऐतिहासिक स्थल अहिले संरक्षण नहुँदा ठड्याएका ढुंगाहरु लडेको र भत्केको अवस्थामा पुगेको छ । तिब्बती सेनालाई तर्साउन रातारात नेपाली सेनाले सेनाजस्तै ढुंगा ठड्याएका थिए । तर २०७२ सालको भूकम्पले अधिकांश ढुंगाहरु लडिसकेका छन् । केही ढुंगाहरु भेडा गोठाला र घुम्न पुगेका पर्यटकहरुले लडाएको स्थानीय लोर्के तामाङले जानकारी दिनुभयो । ४१०० मिटर उचाईमा रहेको थोबोगङ राष्ट्रिय महत्व बोकेको ऐतिहासिक र पर्यटकीय स्थल हो । यसलाई बुलुङबाट पदमार्ग निर्माण गरी यसको संरक्षणमा ध्यान दिने विगु–३ का वडाअध्यक्ष ढाल बहादुर तामाङले बताउनु भयो । बुलुङबाट डेढ दिनमा पुग्ने भएकाले ठाउँ ठाउँमा खानेपानी, बास स्थान र पदमार्ग निर्माण गरी पर्यटकलाई सहज बनाउने वडाअध्यक्ष तामाङले बताउनु भयो ।

१२१८ औं शताब्दीतिर नेपाली सेनाले तिब्बती सेनालाई तर्साउन एकै रात बाह्र सय वटा ढुंगा ठडाएका थिए । नेपाली सेनाले ठड्याएका ढुंगालाई सेनाको पोसाक लगाईदिएपछि तिब्बती सेनाको ध्यान त्यतै गयो । तिब्बती सेनाको गोली बारुद सकेपछि नेपाली सेनाले मौका छोपी तिब्बती सेनामाथि ढुंगामुडा र घङ्गारुको लाठी प्रहार गरी लखेटिएको किंवदन्ती छ । घङ्गारुको लाठीको लागि झ्याँकुबाट ४ सय, लामाबगरबाट ३ सय, ओराङबाट ४ सय, बुलुङबाट ५ सय र लादुकले ७ सय थान लाठी जम्मा गरेर थोबोगङ पुर्याउनुपर्ने निर्देशन रहेको स्थानीय लोर्के तामाङले बताउनु भयो । गाउँबाट थोबोडाँडा नजिक रहेकाले आफ्ना जिजुबाजेहरुको पनि भूमिका रहन सक्ने तामाङले बताउनु भयो ।

यस क्षेत्रमा खानेपानी र बाटोघाटो निर्माणको लागि विगु गाउँपालिकाले कार्यक्रम तथा बजेट विनियोजन गरी अघि बढ्ने उपाध्यक्ष देविका थामीले जानकारी दिनुभयो । पालिकाले महत्वपूर्ण स्थानको महत्व बुझ्न नसकेकाले अब यस बारे गम्भीर ढंगले लाग्ने उपाध्यक्ष थामीले बताउनुभयो ।

प्रकाशित मिति: बुधबार, मंसिर १२, २०८१ ०९:१५

प्रतिक्रिया दिनुहोस्