मेलुङ गाउँपालिकामा केरा खेती बिस्तार

मेलुङ गाउँपालिका

गृहपृष्ठ
मेलुङ गाउँपालिका

मेलुङ गाउँपालिकामा केरा खेती बिस्तार

इ दैनिक सहकर्मी बुधबार, माघ ९, २०८१

किसानको आयआर्जनको लागि मेलुङ गाउँपालिकाले केराखेती बिस्तार गरेको छ । अन्य खेतीभन्दा नियमित रुपमा फल दिने र बिक्री गर्न सजिलो हुने भएकाले मेलुङ गाउँपालिकाका ४ वटा वडाले केरा खेतीलाई प्राथमिकता दिएका छन् ।

आर्थिक वर्ष २०८१/८२ मा मेलुङ गाउँपालिकाले केराखेती विस्तारको लागि २० लाख बजेट विनियोजन गरेको छ । केरा खेतीको लागि उपयुक्त ठानिएका वडाहरुमा १, २, ४ र ७ रहेको छ । किसानलाई केरा खेतीप्रति उत्साहित पार्नको लागि गाउँपालिकाले बजेट विनियोजन गर्नुको साथै प्राविधिक ज्ञान, तालिम र विरुवा समेत वितरण गर्दै आएको मेलुङ गाउँपालिकाका अध्यक्ष हिरा कुमार तामाङले बताउनु भयो ।

बेला बेलामा मलजल गर्न सकेमा आम्दानीको राम्रो स्रोत बन्ने गरेको मेलुङ–२ का केराखेती किसान रामहरि अधिकारीले बताउनु भयो । अधिकारीले मासिक ४/५ हजारको केरा बिक्री गर्दै आएका छन् । केरा बिक्री गर्न बजार जानु नपर्ने, घरमै किन्न आउने गरेको हुनाले केराखेती सजिलो र नियमित आयस्रोतका पाटो बनेको अधिकारीले बताउनु भयो । उनले ३ रोपनी पाखाभित्ता जग्गामा केरा खेती गर्दै आएका छन् । यस ठाउँको हावापानी अनुसार मर्चमाने जातको केरा लगाएका हुन् । यस भेगमा एक परिवारले वार्षिक साढे दुई लाखसम्मका केरा बिक्री गर्ने गरेको मेलुङ–२ का वडाअध्यक्ष रामकृष्ण भण्डारीले जानकारी दिनुभयो ।

गाउँपालिकाले केरा खेतीमा अनुदान दिन थालेपछि कल्लेरी, नयाँ वस्ती, ठामीडाँडा, स्याखे र बासबोटेका किसानहरुले व्यवसायीक रुपमा केराखेती गर्न थालेका छन् । बाँदर, दुम्सी, मृगले असर नपार्ने भएपछि किसानहरु केरा खेतीप्रति उत्साहित हुन थालेको वडाअध्यक्ष भण्डारीले बताउनुभयो ।

प्रकाशित मिति: बुधबार, माघ ९, २०८१ ११:२९

प्रतिक्रिया दिनुहोस्