मेलुङ गाउँपालिका–४, भेड्पुमा रहेको ‘हल्लिने ढुंङ्गा’ आन्तरिक पर्यटकका लागि नयाँ आकर्षणको केन्द्र बनेको छ । सामान्यतः ठूलो देखिने उक्त ढुंङ्गा औंलाको सामान्य स्पर्शमै हल्लिन्छ, जसले पर्यटकलाई चकित बनाइरहेको छ ।
स्थानीय बासिन्दा पन्थ सिंह तामाङका अनुसार हल्लिने ढुंङ्गा तत्कालीन राजा महेन्द्र शाहको भ्रमणका क्रममा भेटिएको थियो । वि.सं. २०११ सालतिर राजा महेन्द्रलाई भेड्पुमा आयोजित कार्यक्रममा आमन्त्रण गरिएको थियो । राजा आउने भएपछि स्थानीयहरूले बाटो निर्माण गर्दा उक्त विशेष ढुंङ्गा भेटिएको हो । “राजा महेन्द्रले समेत ढुंङ्गालाई औंलाले हल्लाएर हेर्नुभएको थियो,” तामाङले सम्झिए । करिव १० फुट लामो र ठूलो ढुंङ्गालाई औलाले हल्लाउन सक्नु जोकोहीलाई अचम्म लाग्न सक्छ ।
हाल सामाजिक सञ्जालमार्फत फोटो तथा भिडियो भाइरल भएपछि हल्लिने ढुंङ्गा हेर्न काठमाडौंलगायत विभिन्न ठाउँबाट पर्यटक आउन थालेका छन् । “महिनामा पाँचदेखि दस जना पर्यटक यहाँ आउँछन्,” तामाङले बताउनु भयो । चरिकोटबाट डेढ–दुई घण्टामै पुग्न सकिने भएकाले धेरैजसो युवायुवती टिकटक, फेसबुक र ट्विटरका लागि सामग्री खिच्न यहाँ पुग्ने गरेका छन् । ढाड दुख्दा यस ढुंङ्गामा दलेपछि निको हुने जनविश्वास छ ।
सडक नहुँदा पहिला रामेछाप जानलाई यही बाटो हिडेर जानु पथ्र्यो । सडक सञ्जाल विस्तारसँगै अहिले आवतजावत घटेपनि यसको ऐतिहासिक महत्व अझै कायम छ । यहाँबाट दोलखाको गौरीशंकर हिमाल, चेर्दुङडाँडा, हनुमन्तेडाँडा र तामाकोशी नदी सहजै अवलोकन गर्न सकिन्छ । यस गाउँको नामनै हल्लिने ढुंङ्गाबाट नामकरण गरिएको स्थानीय सूर्य बहादुर गोलेले बताउनु भयो ।
हल्लिने ढुंङ्गा मेलुङ गाउँपालिकाको लागि फरक र नौलो भएकाले यस ठाउँलाई पर्यटकको लागि उत्कृष्ट र नयाँ गन्तव्य बनाउनको लागि आगामी आर्थिक वर्षमा बजेट विनियोजन गरी थप पूर्वाधार निर्माण गर्ने मेलुङ गाउँपालिका अध्यक्ष हिरा कुमार तामाङले बताउनु भयो ।
-1743416799.jpeg)
