वैशाख २० गते सोक्ला रक क्लाइम्बिङ महोत्सव

भीमेश्वर नगरपालिका

गृहपृष्ठ
भीमेश्वर नगरपालिका

वैशाख २० गते सोक्ला रक क्लाइम्बिङ महोत्सव

इ दैनिक सहकर्मी शनिबार, वैशाख १३, २०८२

सोक्ला भ्यालीमा रक क्लाइम्विङ महोत्सव तथा प्रतियोगिता २०८२ हुने भएको छ । दोलखाको भीमेश्वर नगरपालिका २ सोक्ला भ्यालीमा रक क्लाईम्विङ महोत्सवको तेस्रो संस्करण आयोजना गर्न लागेको हो ।

सोक्लाश्वरी पर्यटन विकास समाजको आयोजनामा ‘एडभेन्चर क्लाइम्बिङ हव’को रूपमा सोक्ला भ्यालीको प्रवद्र्धन गर्ने उद्देश्यका साथ दुई दिने महोत्सव आयोजना गर्न लागेको आयोजकले जनाएको छ । नेपाल पर्यटन बोर्डको आर्थिक सहयोग र स्थानीय तह र विभिन्न निकायको सहकार्यमा वैशाख २० र २१ गते रक क्लाइम्विङ महोत्सव हुन लागेको पर्यटन समाजका अध्यक्ष अर्जुन पाख्रिनले जानकारी दिनुभयो । ‘साहसिक पर्यटनको विकास गर्ने उद्देश्यले सोक्लामा रक क्लाइम्बिङ सुरू गरिएको हो’, समाजका अध्यक्ष पाख्रिनले भन्नुभयो ‘सोक्ला र चक्पा क्षेत्रमा पर्ने गुमडाँडाको भीर ४२० मिटरको पहाड हो । यही प्राकृतिक चट्टानमा रक क्लाईम्विङ गन्तव्यको विकास गर्न महोत्सव आयोजना गरेका छौं’ उहाँले भन्नुभयो ।

सोक्ला र चक्पाको भीरमा आयोजना गरिने रक क्लाइम्बिङको लागि २५/२५ मिटरको दुई वटा सिंगल पिचको रक रुट तयार गरिएको छ । यस वर्ष रक रुट सय मिटरको उचाईमा पुर्याउने लक्ष्य रहेको पर्यटन विकास समाजले जनाएको छ । सदरमुकाम चरिकोटबाट आठ किलोमिटर दुरीमा रहेको सोक्ला गाउँ धार्मिक एवम् सांस्कृतिकरूपमा समेत महत्वपूर्ण रहेको छ । सोक्ला गाउँ विशेषगरी कृषि पर्यटनसँगै, पर्यापर्यटन, साहसिक पर्यटन, चरा पर्यापर्यटन, गौरीशंकर हिमश्रृङ्खलाको दृश्य अवलोकन र धार्मिक अध्ययन अनुसन्धानका लागि यो क्षेत्र प्रसिद्ध छ ।
महोत्सवका लागि माउन्टेन गाइड एसोसिएसन अफ नेपालले प्राविधिक पक्षको संयोजन गरेका छन् । रक क्लाइम्बिङ उद्घाटन समारोहमा स्थानीय आदिवासी झाँकी, ताम्बा, झाँक्री, मारुनी नाचसँगै पञ्चै बाजाको समेत प्रस्तुति रहने छन् । कार्यक्रममा हिमाल आरोही, स्काउट, नेपाली सेना, सशस्त्र प्रहरी, नेपाल प्रहरीसँगै पर्यटक प्रहरीको समेत सहभागिता रहने छन् । साथै पर्यटन संघ, संस्थाको समेत सहभागीता रहने आयोजकले जनाएको छ । साथै रक क्लाइविङ महोत्सवमा झण्डै तीन सयको सहभागिता रहने अपेक्षा गरिएको छ । यस अवसरमा रक क्लाइम्बिङ प्रतियोगिता समेत गराइने छ । प्रतियोगितामा सहभागी हुनेले नगद पुरस्कारसहित प्रमाणपत्रको व्यवस्था गरेको आयोजकले जनाएको छ ।

प्रकाशित मिति: शनिबार, वैशाख १३, २०८२ १६:११

प्रतिक्रिया दिनुहोस्